Teeja, Daswa, Chaaliswa, Barsi Wagairah par Tauseef ur Rehman ke aitraz ka Jawab

Teeja, Daswa, Chaaliswa, Barsi Wagairah Esale Sawab ki Mukhtalif Surto par Wahabi Maulvi par Tauseef ur Rehman ke aitraz ka Jawab

🔺 Tauseef ur Rehman ka Aitraz

Jo Amal ahad e Rasoolallah ﷺ me na huwa ho ya jo Amal Huzurﷺ ne nahi kiya ho woh nazaiz aur Biddat hai aur har aisa naya kaam Mardood hai.

Maslan Teeja, Daswa, chaliswa, Barsi Wagairah yeh Tamam amal Mardood aur Haram wa biddat hai kyunki Huzurﷺ ne nahi kiya Bhale hi is me log achche amal karte hai. Jaise Quran Padhte hai aur Zikro tasbihaat padte hai.

Iski misal ye hai ki koi shaks Namaz mein 2 ke badle 3 Sajde kare haalanki Sajda Allah hi ke liye karta hai aur teesre Sajde me Tasbihat yaani Allah hi ka Zikr karega magar teesra Sajda karna haram o najaiz hoga aur uske liye gunah wa barbadi hogi Kyun ki Huzurﷺ ne sirf 2 sajde kiye hai aur sirf 2 Sajdo ka hukum diya.

Issi tarah koi Azan me aakhri kalme me sirf "LAA ILAAHA ILLALLAH" kehne ke badle Muqaammal  "LAA ILAAHA ILLALLAH MUHAMADUR RASOOLALLAH" kahe to aisa karna galat hoga kyun ki Huzurﷺ ne sirf "LAA ILAAHA ILLALLAH" kehne ka hukum diya hai. Haalanke woh kalme ko pura padh raha hai.

Pata chala ki har naya amal jo Huzurﷺ ne nahi kiya woh biddat hai aur gumrahi hai aur na maqbool wa mardood hai. Yaani jis amal par Rasoolallahﷺ ki mohar na lagi ho woh Allah ke yaha qabool na hoga.

🔺🔺 JAWAB

Wahabi maulvi ne biddat ke naam par dhoka dene ki koshish ki hai. Agar biddat ka mahfoom yahi hai jo wahabi bata rahe hai to yeh unka sahih hadith se inkaar hai.

Teeja, Daswa, chaaliswa, Barsi yeh sab amal Esale sawab ki mukhtaleef surate hai. yeh tamam amal shakal ke aitbaar se naye hai magar asal ke aitbaar se purane aur Sahi hadees se Sabit hai

Wahabi Maulvi ne misaal to achchi di hai magar yeh misaal unke dawa ke suboot par fit nahi hoti hai. Kyunki Shayad Wahabi maulvi ko yeh maloom nahi ki 

Deen me 2 Tarah ke jaiz amal hote hai

1. Masnoon Amal jiska makhsus wa mutaain tareeqa ain Sunnat se sabit ho ya Jiska Makhsoos hukum Diya gaya ho.

Aur

2. Woh amal jo Sunnat nahi magar Sunnat ke khilaf bhi nahi aur na shariat me uski koi mumaniyat ho yaani oos amal ka koi makhsoos tareeka ya hukm na ho balki aam ho aur uski asal Sunnat me maujood ho.

Namaz me 2 Sajde aur Azaan me aakhri Kalme mein sirf "LA ILAAHA ILLALAH" kehna ain sunnat se sabit hai aur uska makhsoos hukm hai. Aise amal ko badal kar alag tareeke se karna ya us mein izafa karna najaiz aur haram hota hai.

Magar aisa amal jo ain sunnat se sabit na ho aur na us amal ka koi makhsoos hukm ho magar woh amal Sunnat ke khilaf bhi na ho aur na Shariat me us amal ki mumaniyat ho balki woh aam hukm ke tehat dakhil ho to aise amal ko karne me koi harj nahi. Maslan Tarawwih ki Namaz 30 din Ba Jamat ada karna jaiz hai haalanki ain sunnat se sabit nahi magar Sunnat ke khilaf bhi nahi

Isi tarah Mayyit ke liye Isale Sawab ka hukm aam hai aur Teeja, Daswa, Chaliswa Wagairah usi aam hukm ke tehat dakhil hai. Lihaza yeh haram nahi balki jaiz hai.

BIDDAT KA SAHI MEHFOOM AAPKO BATATE HAI

Ahle ilm ke nazdeek Bidat ki Istelahi Tareef darj e zeel hai:

1) IMAM NAWAWI (631-677 Hijri)

Biddat ki Tareef in Alfaz mein karte hai.
"Biddat se Murad aise naye kaam ki Ijaad jo Ahad e Risaalat e Maab mein na ho"
[ NAWAWI- TEHZEEB UL ASMA WAL LUGAT. 3:22]

2) SHAIKH IBNE RAJAB HANBALI (736-795 Hijri)

Biddat ki istelahi tareef in Alfaz me karte hai.
"Biddat se murad woh naya kaam hai jis ki shariat mein koi asal maujood na ho jo us par dalaalat kare. Lekin har woh mu'amla jis ki asal shariat mein maujood ho woh sharahan biddat nahi. agarche woh lugwi aitbaar se biddat hoga"
[ IBNE RAJAB, JAME UL ULOOM WAL HUKM FI SHARAH KHAMSIN HADITHAN MIN JAWAMEUL KALAM, 252]
[ AZEEMABADI, AUNUL MABOOD SHARAH SUNAN ABU DAWOOD, 12:235]
[ MUBARAKPURI TOHFATUL AKHWAZI SHARAH JAME UL TIRMIZI, 7:366]

3) HAFIZ IBNE HAJAR ASQALANI (773-852 Hijri)

Biddat e hasna aur Biddat e Sayeea ki wazahat karte hue likhte hai.
"Tehqeeq yeh hai ki agar biddat koi aisa kaam ho jo shariat me mustahasan umoor mein shumar ho to woh Hasana hai aur agar woh shariat mein na pasandida umoor me shumar ho to woh qabiha hogi"
[ ASQALANI, FATAHUL BARI 4:253]
[ SHAUKANI, NAINUL AVTAAR SHARAH MANTAQUIL AKHBAR, 3:63]

TAQSEEM E BIDDAT PAR SAHI HADEES / BIDDAT E HASNA AUR BIDDAT E SAYIEEA PAR SAHI HADITH

Hazrat Jarir bin Abdullah رضي الله تعالى  se riwayat hai ke Huzoor ﷺ ne farmaya jo shaksh Islam mein kisi nek kaam ki buniyaad dale to uske liye uske apne amaal ka bhi sawab hai aur jo uske baad is par amal karenge un ka sawab bhi hai, bagair iske ke unke sawab mein koi kami ki jaye. Aur jisne islam mein kisi buri baat ki ibtida ki to us par uske apne amal ka gunah hai aur jo uske baad is par amal karenge unka bhi gunah hai bagair iske ke unke gunah mein kuch kami hai.
[ SAHI MUSLIM, KITAB US ZAKAT WA KITAB UL ILM]
[ SUNAN NISAI, KITAB US ZAKAT]
[ SUNAN IBNE MAJA, MUQADDAMA]
[ MUSNAD AHMED BIN HANBAL 4:357/359]

BIDDAT KE ISTELAHI TAREEF AUR BIDDAT KI TAQSEEM SE YEH PATA CHALA KI AGAR KOI NAYA KAAM (AMAL) SHAKAL KE AITBAAR SE NAYA HO MAGAR ASAL KE AITBAAR SE PURANA HO TO USSE BURI BIDDAT NAHI KAHENGE.